Á opnunarhátíð Athafnavikunnar fékk Katrín Júlíusdóttir, iðnaðarráðherra fyrstu teygjuna afhenta. Hún ákvað að afhenda Þorsteini Inga Sigfússyni, forstjóra Nýsköpunarmiðstöðvar Íslands sína athafnateygju með þeim óskum að hann setti af stað skapandi aðgerð. Það var ekki að spyrja að viðbrögðunum hjá NMÍ því þau hreinlega settu af stað  "teygjustökk" en hér má lesa nánar um þetta glæsilega framtak. Við viljum þakka Nýsköpunarmiðstöð Íslands fyrir gott og skemmtilegt samstarf í Athafnavikunni.

Einn af megin viðburðum Athafnaviku, Snilldarlausnir Marels 2009,  er nú lokið. Nemendur á framhaldsskólastigi áttu að nota hugmyndaflugið til að auka virði herðatrés, taka hugmyndina upp og senda inn í keppnina. Katrín Jakobsdóttir tók á móti siguvegurum fyrr í dag og afhenti verðlaun fyrir bestu hugmyndina, frumlegustu hugmyndina og besta myndbandið. Það voru Marel, Samtök atvinnulífsins, Nova og Dominos Pizza sem studdu Snilldarlausnir.

Hægt er að nálgast myndböndin á heimasíðu Snilldarlausna.

Athafnavikunni lauk formlega sl. sunnudag. Það er þó nokkuð ljóst miðað við undirtektir þjóðarinnar og þátttöku í Athafnavikunni að Íslendingar sitja ekki auðum höndum. Það var sérstaklega ánægjulegt að fylgjast með Athafnateygju Innovit sem hvatti svo marga til framkvæmda og víða myndaðist skemmtileg samkeppni innan vinnustaða og vinahópa. Í aðdraganda vikunnar hef ég kynnst svo mörgum athafnasömum og skemmtilegum einstaklinum og allir eiga þeir jákvætt hugarfar og dugnaðinn sameiginlegan. Ég vil þakka ykkur öllum fyrir hvatninguna og skemmtilegt samstarf! Þó svo að Athafnavikan sé liðin er engin ástæða til að setjast niður og bíða eftir þeirri næstu að ári heldur ætla ég að halda áfram að setja inn nokkrar fréttir og myndir frá skemmtilegum viðburðum Athafnavikunnar 2009.

-Þórhildur

Athafnavikan fór vel af stað hérna á Höfn og við erum með 65 atburði skráða sem hlýtur að teljast góður árangur í sveitarfélagi sem telur um 2.100 íbúa.

Kærleikstrefillinn lengist  og lengist og núna áðan voru krakkar úr fimmta bekk Grunnskóla Hornafjarðar að prjóna  þátttakendur í honum eru orðnir rúmlega  fjörutíu. Vinnu við málverkið lýkur í dag og eigum við von á leikskólabörnum frá leikskólanum Krakkakoti til okkar eftir hádegi. Mér skilst að fjöldi þeirra sem höfðu málað í gær væri í kringum fimmtíu manns. Í hádeginu 16. - 18. nóvember bauð Þekkingarnet Austurland upp á  hláturjóga.  Það er ferlega skemmtilegt og losar um uppsafnaða spennu, hláturjógað fer fram í miðrými Nýheima og höfum við sem tókum þátt í því fengið mikla athygli og hláturinn smitað út frá sér.  Ari Þorsteinsson hjá Nýsköpunarmiðstöð Íslands sýndi myndband frá Noregi þar sem búið var að útbúa litla útgáfu af virkjun sem byggði á þeim kröftum  sem myndast þegar saltvatn mætir fersku vatni eða osmósa. En hér í sýslunni eru góð skilyrði fyrir slíkar virkjanir. Ari hefur einnig verið að gera osmósugjörning með eggjum  hægt er að skoða þau hér í Nýheimum á frumkvöðlaganginum. Framhaldsskólinn í Austur Skaftafellssýslu var með þrautalausn í hádeginu en hún gekk út á það að þátttakendur áttu að koma eggjum á milli staða án þess að nota hendur. Þá var einnig sýndur sjónvarpsþátturinn Handan við Hornið, en það er afrakstur af verkefni sem þrír nemendur framhaldskólans unnu á námskeiðinu Sóknarbraut sem var haldið síðastliðið vor.

Athafnateygjurnar okkar Hjalta ganga nokkuð rösklega manna á milli og ef ég verð vör við að teygjurnar stoppi þá hika ég ekki við að ýta við fólki. Við viljum  að sem flestir bæjarbúar fái tækifæri til að vera með í þessum skemmtilega leik það er líka svo gaman að sjá hvað fólk er að fást við. Hægt er að sjá hvernig teygjurnar ganga um bæinn á www.athafnateygjan.is

Við viljum hvetja íbúa sveitarfélagsins til að kynna sér vel þá viðburði sem verða í boði og vera dugleg að mæta og taka þátt. Hér er slóðin að viðburðadagatalinu.

 http://www.rikivatnajokuls.is/media/vidburdir/athafnavika.pdf 

Með athafnakveðjum frá undirbúningshóp Björk Pálsdóttir hjá Nýsköpunarmiðstöð Íslands.

Einn af fyrstu viðburðum Athafnavikunnar var áhugaverður og skemmtilegur hádegisfundur hjá Auði Capital. Halla Tómasdóttir og Vilhjálmur Þorsteinsson héldu þar erindi um Þjóðfundinn og Ísland 2.0. Hádegið var sannarlega uppbyggilegt og þéttsetið í salnum í nýjum húsakynnum Auðar Capital. Á mynd hér fyrir neðan má sjá Höllu Tómasdóttur afhenda Bjarneyju Harðardóttur hjá Íslandsbanka Athafnateygjuna sína.

Hillary Clinton, Gordon Brown, Sir Richard Branson, Carl Scramm, Lord Mandelson og Íslendingurinn Gunnar Hólmsteinn á meðal talsmanna sem koma fram í þessu hvatningarmyndbandi Alþjóðlegrar athafnaviku á heimsvísu!

Alþjóðleg athafnavika hefst í dag og stendur til 22. nóvember næstkomandi.

Á einni viku munu 103 þjóðir í sex heimsálfum sameinast í Alþjóðlegri
athafnaviku með það að markmiði að hvetja fólk til að tileinka sér
nýsköpun, athafnasemi og frumkvöðlahugsun.

Hér á Íslandi eru 114 viðburðir skráðir, sjá nánar: Dagskrá athafnaviku

Opnunarhátíð

Opnunarhátíð Alþjóðlegrar athafnaviku hefst kl. 17:00 í Norræna húsinu
mánudaginn 16. nóvember

Dagskrá opnunarhátíðar:

17:00 - Þórhildur Birgisdóttir, framkvæmdastjóri Alþjóðlegrar athafnaviku
           ávarpar gesti
17:05 - Katrín Júlíusdóttir, Iðnaðarráðherra, setur athafnavikuna formlega
17:15 - Guðfinna S. Bjarnadóttir kynnir niðurstöður þjóðfundar
17:25 - Skemmtiatriði
17:30 - Andri Heiðar Kristinsson, framkvæmdastjóri Innovit
           afhendir iðnaðarráðherra Athafnateygju Innovit nr. 1

Kynnir: Linda Ásgeirsdóttir, leikkona

Þegar formlegri dagskrá lýkur verður boðið upp á léttar veitingar

Átöppuð kvenorka seld á Alþjóðlegri athafnaviku.

Fjölmiðlakonan og hönnuðurinn Andrea Róbertsdóttir hefur elt nokkrar íslenskar konur síðustu misserin. Vigdís Finnbogadóttir, Jóhanna Kristjónsdóttir, Svava Johansen, Thelma Ásdísardóttir, Svafa Grönfeldt, Edda Heiðrún Backman, Þórey Edda Elísdóttir og Freyja Haraldsdóttir eru dæmi um konur og fyrirmyndir sem hún hefur elt á röndum um allan bæinn og tappað orkunni sem af þeim gustar á tóbakshorn. Ekki má svo gleyma allri þeirri yndislegu kvenorku sem Andrea safnaði á Grund og á Hrafnistu.

Íslenskar konur eru nefnilega einstakar og hér á landi eigum við fjölmargar frábærar fyrirmyndir. Um ræðir íslenskar konur sem hafa einstakt þor og kjark sem ekki veitir af að tappa á flöskur fyrir okkur hin. Tóbakshornin eru vísun í gamla tíma og þann karllæga heim sem við lifum í.  Þau verða stútfull af einstakri íslenskri kvenorku, ótal tegundir í boði en einnig verður hægt að leggja inn pöntun á sölustað.

Innihald tóbakshornsins hentar ungum Íslendingum á öllum aldri, jafnt konum sem körlum. Er þessi átappaða orka ekki síður hugsuð sem útflutningsvara því íslenskar konur; þeirra þekking, hæfileikar, orka, þor, dugnaður og mannauður er þannig saman settur að eftir er tekið um heim allan.

Tóbakshornin verða seld í nýrri verslun Eymundsson Skólavörðustíg 11 (áður SPRON) þriðjudaginn 17. nóvember 2009 kl. 12-18. Sá dagur er sérstaklega helgaður viðburðum athafnakvenna á Alþjóðlegri athafnaviku sem verður haldin á Íslandi 16. – 22. nóvember 2009.

Hornin kosta 1.000 íslenskar krónur og rennur allur ágóðinn í innkaup fyrir iðjuþjálfun heimilismanna á Hrafnistu í Reykjavík og Hafnarfirði og á Grund. Ef einhverjir hafa sérstakan áhuga á að styrkja málefnið enn frekar er hægt að útvega heilan gám, af þessari einstöku orku.

Konur eru konum bestar!

Nú fer Athafnavikan alveg að hefjast en einn af viðburðum hennar er Framkvæmdabókin sem Actavis styrkir. Þessari litlu bók verður dreift til þátttakenda viðburða vikunnar en í henni eru hvítar auðar síður sem munu vonandi fyllast af hugmyndum og teikningum tilvonandi eigenda. Bókin er handhæg framkvæmda- og hugmyndabók sem hægt er að nota til að skrifa niður hugmyndir, minnisatriði, punkta frá fundum og fyrirlestrum, upplýsingar um nýja tengiliði og hvað eina sem þér dettur í hug! Framkvæmdabókin er framleidd af Odda sem er bakhjarl Athafnavikunnar. 

Í tilefni af alþjóðlegri athafnaviku, býður Landsvirkjun, í samstarfi við Vaxtarsamning Norðurlands vestra, til samráðsfundar í Blönduvirkjun, fimmtudaginn 19. nóvember næstkomandi.  Fundurinn stendur frá kl. 14 – 18. 

Ný sóknarfæri á Norðurlandi vestra – umhverfi og afurðir  

Rætt verður um þau sóknarfæri sem felast í umhverfisvænum áherslum í atvinnu- og menningarlífi í fjórðungnum.  Sem dæmi ná nefna nýja og/eða betri nýtingu afurða, jafnvægi milli verndunar og aðgengis náttúruperla, fræðslu og rannsóknir. 

Fundinum er ætlað að skapa umræðu og gerjun og tengja saman fólk sem hefur áhuga á þessum málum og vill eiga þátt í að móta hugmyndir og gera að veruleika.

Sjá alla fréttina